जितपुर : बाराको जीतपुरसिमरा उपमहानगरपालिका वडा नम्बर १३ पोतामा भलिबल प्रतियोगिताको आयोजना गरिएको छ ।
मधेश प्रदेश भलिबल संघले आयोजना गरेको उक्त प्रतियोगितामा बारा,पर्सा र सर्लाही जिल्लाको महिला र पुरुष भलिबल क्लबहरुका खेलाडीहरुको सहभागिता रहेको छ ।
१० औँ राष्ट्रिय खेलकुद प्रतियोगितामा सहभागी गराउँने उदेश्यले मधेश प्रदेशका बिभिन्न ठाउँहरुबाट खेलाडी छनोट गर्ने काम भईरहेकोले उक्त प्रतियोगिताको आयोजना गरेको मधेश प्रदेश भलिबल संघका महासचिव रामानन्द सिंह थारुले जानकारी दिएका छन ।
खेलाडी छनौटकै उदेश्यले पोतामा भलिबल प्रतियोगिता गरी खेलाडि छनोटको काम भईरहेको महासचिव थारुले जानकारी दिए । खेलमा जित्ने टिम मात्र नभई राम्रो खेल्ने प्रदेशका महिला र पुरुष १२।१२ जना खेलाडी छनोट हुने महासचिव थारुले जनाए ।
राष्ट्रिय खेलकुद प्रतियोगिता कर्णाली प्रदेशको सुख्रेतमा फागुन महिनामा हुने जनाईएको छ । यस भन्दा अगाडी मंसीर २ गतेदेखि राष्ट्रिय खेलकुद प्रतियोगिता सुरु गर्ने भनिएपनि तयारी पुरा नभएर स्थगित भएको थियो ।
प्रतियोगिता अघि भएको औपचारिक कार्यक्रमको प्रमुख अतिथि वडा नं.१३ का वडा अध्यक्ष हेमनारायण चौधरी रहेका थिए भने कार्यक्रममा जितेन्द्र चौधरी ,प्रमोद चौधरी लगायतको सहभागिता रहेको थियो ।
