कलैया : बाराको सिम्रौनगढ नगरपालिकाका निमित प्रमुख प्रशासकीय अधिकृत बिरुद्ध भ्रष्टाचार मुद्दा दायर भएको छ ।
अख्तियार दुरुपयोग अनुसन्धान आयोग टंगाल,काठमाडौंले निमित प्रमुख प्रशासकीय अधिकृत बीरेन्द्र प्रसाद साह कानु बिरुद्ध भ्रष्टाचार मुद्दा दायर गरेको हो ।
अख्तियारले शुक्रबार बिशेष अदालत काठमाण्डौमा निमित प्रमुख प्रशासकीय साह बिरुद्ध भ्रष्टाचार मुद्दा दायर गरेको अख्तियारका प्रवक्ता नरहरी घिमिरले प्रेस विज्ञप्ती मार्फत जानकारी गराएका छन ।
अधिकृत कानुलाई सेवाग्राहीसँग घुस/रिसवत लिई रहेको अवस्थामा अख्तियार दुरुपयोग अनुसन्धान आयोग क्षेत्रिय कार्यालय मकवानपुर हेटौडाको टोलीले गत असोज १० गते नियन्त्रणमा लिएको थियो ।
कानुले एक सेवाग्रहीसंग बिल भुक्तानी गरेवापत रु ७८ हजार घुस रकम सहित अख्तियारको टोलीले पक्राउ गरेको थियो ।
अनुसन्धानको सिलसिलामा निमित्त प्रमुख प्रशासकीय अधिकृत कानुले बिल भुक्तानी गरेवापत सेवाग्राहीसँग घुस/रिसवत लिएको पुष्टी भएपछि उनी बिरुद्ध मुद्दा दायर गरिएको अख्तियारले विज्ञप्तीमा उल्लेख गरेको छ ।
अख्तियारले अधिकृत साह बिरुद्ध भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुरमा बिगो रु.७८ हजार रुपैयाँ कायम गरी भ्रष्टाचार निवारण ऐन, २०५९ को दफा ३ को उपदफा (१)को देहाय (ग) बमोजिम कैद सजाय गरी सोही ऐनको दफा ३ को उपदफा (१) अनुसार बिगो बमोजिम जरिवाना सजाय गर्न आयोगले माग दाबी सहित विशेष अदालतमा मुद्दा दायर गरेको छ ।
