कलैया । बारामा बिहीबार एक मोटरसाइकल अनियन्त्रित भई पल्टिदा एक जनाको मृत्यु भएको छ। सो दुर्घटनामा परी दुई जना घाइते भएका छन्।
जिल्ला प्रहरी कार्यालय बारा अनुसार मृत्यु हुनेमा पर्साको वीरगञ्ज महानगरपालिका वडा नम्बर १९ विन्दवासिनी टोल निवासी २० वर्षीय राज मिया रहेका छन्।
उनको उपचारको क्रममा एलएस न्यूरो अस्पताल परवानीपुरमा मृत्यु भएको हो। उनी मोटरसाइकल चालक हुन्।
जिल्लाको जीतपुर सिमरा उपमहानगरपालिका -१० नितनपुर स्थित रहेको शिव शक्ति पेट्रोलपम्प अगाडि जीतपुर बाट वीरगंज तर्फ जादै गरेको म.प्र.०३–०२८ प ३९०९ नम्बरको मोटरसाइकल आफै अनियन्त्रित भई बाटो छेउको रेलिङमा ठोकिन गई दुर्घटना भएको हो।
मोटरसाइकलमा पछाडि सवार पर्साको बौधरमाई गाउँपालिका – ६ भवराटार बस्ने मोलिरहमान मियाको १७ वर्षीय छोरा महबुब मिया घाइते भएका छन्।
उनको टाउको र शरिरको विभिन्न भागमा चोट लागेको छ। उनको अवस्था गम्भीर रहेको छ।
यस्तै मोटरसाइकल पछाडि पर्सा वीरगंज महानगरपालिका वडा नम्बर १९ केहुनिया टोल बस्ने सरोजप्रसाद यादवको १६ वर्षीय छोरा बिक्की यादव घाइते भएका छन्।
उनको टाउको र शरिरको विभिन्न भागमा चोट लागेको छ। उनको अवस्था मध्यम रहेको छ।
घाइतेहरुको परवानीपुरस्थित एलएस न्यूरो अस्पताल परवानीपुरमा उपचार भइरहेको जिल्ला प्रहरी कार्यालय बाराका प्रवक्ता एवम् प्रहरी नायब उपरीक्षक प्रकाश सापकोटाले जानकारी दिएका छन्।
