बिल बिजक भन्दा बढी हार्डवेयर तथा खुद्रा सामानहरु लोड रहेको मालवाहक एउटा ट्रक पर्सा प्रहरीले नियन्त्रणमा लिएको छ ।
प्रहरीले बोकेको माल बाहक ट्रक वीरगञ्जबाट चितवनतर्फ जाँदै गरेको छ भन्ने सूचनाको आधारमा सो ट्रक प्रहरीले नियन्त्रणमा लिएको जिल्ला प्रहरी कार्यालय पर्साले जनाएको छ।
वीरगञ्ज महानगरपालिका ८ घण्टाघर स्थित सडकखण्डमा जाँच गर्दा प्रहरीले म.प्र.०३–००२ ख १४४० नम्बरको ट्रकलाई रोकी जाँच गरेको हो । सोही क्रममा उक्त ट्रकबाट बिल बिजक भन्दा बढी सामान बरामद गरिएको प्रहरीको भनाई छ ।
सो ट्रकमा लोड रहेको २७ लाख ७७ हजार छ सय ४१ रुपैयाँ बराबरको हार्डवेयर तथा खुद्रा सामानहरु नियन्त्रणमा लिई थप अनुसन्धान तथा आवश्यक कारवाहीको लागि राजश्व अनुसन्धान कार्यालय पथलैया,बारामा बुझाइएको पर्साका प्रहरी प्रबक्ता दिपक भारतीले साझेदारी दैनिकलाई जानकारी दिए ।
